ACTIVIDADE DE MOTIVACIÓN.   

Iniciamos o proxecto a través dunha fase MOTIVADORA.

Á volta do nadal atopamos que nas nosas aulas había uns agasallos "que deixaran" os reis magos. Neles descubriron un xoguete sorprendente, que non todos, senón máis ben poucos, coñecía: O SEÑOR PATACA.

A continuación comezamos a falar sobre este xoguete, que crían que era e por que o deixarían os Reis?. Chegando á conclusión de que era un boneco dunha pataca:

Después de descubrir do que se trataba este agasallo, fixemos unha pequena reflexión cos nenos/as sobre que sabemos sobre as patacas. Esta recollida realizámola coa axuda dun panel onde se plasmaron os coñecementos e se formularon unha serie de preguntas.

QUE SON AS PATACAS?

Con esta actividade pretendemos estudar:

Que son as patacas? Para que serven? Que forma teñen? Que cor? Etc.

Sempre, antes de levar a cabo as experiencias, adiantamos as ideas previas que teñen os nenos/as sobre este tema, continuando coa creación das súas hipóteses do que vai suceder, para logo, realizar unha comprobación sobre o falado.

Tocamos as patacas, falando da súa textura, forma, tamaño, cor, …

Probamos as patacas para ver que saber teñen. Olemos as patacas para comprobar se teñen olor. Abrímolas e miramos como son as patacas por dentro, …

Debuxo inicial da pataca e invención dun nome.

PLANTACIÓN

Coa realización desta actividade inténtase averiguar as diferentes maneiras de plantar patacas, despois de ir revisando a información que traen os nenos e nenas das súas casas.

Averiguouse que hai diversas formas de plantación e elexíronse tres para levar a cabo nas nosas aulas:

1º ESCOLLEMOS AS PATACAS: miramos as patacas que    teñen gromos e apartámolas do resto.

2º POÑEMOS TERRA NUN RECIPIENTE: escollemos unha caixa transparente para poder observar o proceso de crecemento tanto por arriba como por abaixo.      

3º COMEZAMOS A PLANTAR: para plantar temos en conta que as patacas non poden ir todas xuntas, polo tanto, mediremos uns 20 cm de separación entre planta e planta.

4º CREAMOS O NOSO HORTO NA AULA

( PERMANENTE): na aula temos un lugar permanente onde está o noso horto e recuncho con información sobre as patacas.

SEMANALMENTE: facemos un rexistro do crecemento das plantas.

Regamos, contamos o número de follas, medimos as plantas e, finalmente deixamos constancia de todo nun rexistro ao que denominamos: DIARIO DA PATACA. 

O DIARIO DA PATACA

Con esta actividade pretendemos observar e rexistrar o proceso de crecemento do tubérculo. Esta actividade desenvólvese unha vez á semana polo encargado do día. Consiste en:

1º– Observar a planta, o seu proceso de crecemento.

2º- Regamos as plantas. Unha vez á semana regábanse as plantas, aínda que, revisábanse todos os días para ver se precisaban auga, e de ser este o caso, tamén se regaban.

3º- Medimos as plantas e rexistramos a súa medida. Tamén revisamos     o crecemento que se produce na terra e o rexistramos.

4º- Contamos o número de follas, miramos se as follas son grandes, pequenas, … revisamos se a cor é a debida, …

GRÁFICA DAS PATACA

Con esta actividade rexistramos o crecemento das patacas, as partes que compoñen a planta da pataca, ...

1º COLLEMOS UNHA PATACA E POÑÉMOSLLE UNS PALILLOS EN FORMA DE CRUZ.

2ºCOLLEMOS UNHA XERRA E BOTAMOS AUGA: medimos a cantidade de auga que imos a poñer no recipiente.

 3º METEMOS A PATACA NO RECIPIENTE: poñémola no recuncho da pataca.

SEMANALMENTE  rexistramos o proceso de crecemento e revisamos

 se precisa auga.

HIDROPONÍA

 1º PREPARAMOS UNHA CAIXA: poñémoslle unha rede na parte superior, facémoslle uns cortes, forramos a caixa cunha cartolina negra e deixamos un burato para poder regar.

 2º POÑEMOS AS PATACAS: colocamos as patacas respectando unha distancia de 20 cm. aproximadamente e a continuación regámolas cun pulverizador.

3º GARDAMOS A CAIXA: metemos a caixa dentro dun saco, estirámolo epechámolo con cinta adhesiva. A continuación, fixemos uns buratos para sacar o grelo da pataca fora e por último, vólvese a regar.

4º COLOCÁMOLO NO RECUNCHO DA PATACA.

SEMANALMENTE revisamos o proceso de crecemento e regamos as patacas.

DE ONDE PROCEDEN AS PATACAS?

Con esta actividade pretendemos estudar de onde proceden as patacas.

A súa historia  dende que viñeron dende o Perú ata España.

A nosa variante “ A pataca de Galicia”: a súa plantación na nosa comunidade autónoma.

O logotipo da pataca galega.

Utilizáronse diferentes medios de consulta como: internet, enciclopedias, contos como: Pirracas e as patacas, Os bolechas: a pataca de Galicia, …

A NOSA MASCOTA.

Con esta actividade pretendemos crear a nosa mascota, polo que, logo de xogar co Señor Pataca, cada un elixe con que accesorios lle gusta máis e fai a súa propia.

Para a realización desta actividade precisamos:

• plastilina

• goma eva

• limpapipas

• cola

• etc.

• ... e moita imaxinación

DE QUE ESTÁN FEITAS AS PATACAS?

Con esta actividade pretendemos coñecer algo sobre o que hai “dentro” da pataca, e que tamén esta presente noutros alimentos nas nosas vidas (xamón cocido, mortadela, salchihas... ): o amidón.

Para eso, usamos lugol ou betadine e microscopios.

PARTES DA PATACA E PARTES DA PLANTA

Con esta actividade pretendemos aprender as partes da pataca, as partes da planta da pataca e, cal é a súa función.

COLLEITA DAS PATACAS

Con esta actividade pretendemos completar a aprendizaxe vendo finalizado o proceso de crecemento da planta. Recollemos o froito unha vez vista a floración da planta, concluíndo así co experimento da plantación en terra.

FESTA DAS PATACAS

Con esta actividade damos por concluído o proxecto. Finalizamos cunha festa na que o menú consta de pratos cociñados que teñen como alimento base “a Pataca”. Para a realización desta festa volvemos a involucrar ás familias, tanto na realización da comida como no disfrute da festa.